يلا ننكد عليهم

ينفع أكون مسلم من غير ما أكون أخوان؟ كده الأخوان زعلوا و التانين انبسطوا يلا ننكد عليهم ..ينفع أكون وطني ن غير ما تأييد للسيسي ؟ كده التانين زعلوا و الأخوان أنبسطوا يلا ننكد عليهم ..ينفع أكون محب للشريعة من غير ما أبقي أرهابي ؟ كده الأرهابيين زعلوا و الشرطة أنبسطوا يلا ننكد عليهم ..ينفع أكون مطالب بحقي في أن الشرطة تبقي في خدمتي من غير ما البلطجي يثبتني ؟ كده البلطجية زعلوا و الشرطة كمان بس بتوع حقوق الأنسان أنبسطوا يلا ننكد عليهم .. ينفع تبقي حقوق الأنسان مظلة تشمل كل المصريين بما فيهم البلطجية اللي ما أخدوش حقهم من الرعاية الأجتماعية و التربية الدينية و حقوقهم في العمل و الحياة الكريمة؟ كده بتوع حقوق الأنسان زعلوا و مسئولين الدولة أنبسطوا يلا ننكد عليهم ..ينفع مسئولين الدولة يفهموا أنهم وظيفتهم تأدية الخدمات للناس و أن دي وظيفة مقابل مرتب مش تفضل منهم علينا ؟ كده مسئولين الدولة زعلوا و المواطنين أنبسطوا يلا ننكد عليهم ..ينفع مواطنين الدولة يبطلوا جشع و طمع و يدوروا علي واجبتهم زي ما بيدوروا علي اللي فاكرينه حقوقهم يتقوا ربنا في عملهم و بيطلوا كلمة علي قد فلوسهم ؟ كده المواطنين زعلوا بس الأقتصاد أنبسط يلا ننكد عليه .. ينفع الأقتصاد يتحسن من غير ما يبقي مطلوب مننا شد الحزام و خفض تكاليف حياتنا و رفع اسعار متطلباتنا ؟ كده الأقتصاد زعل بس الرجالة أنبسطوا يلا ننكد عليهم ..ينفع الراجل يبقي راجل بجد يفهم أن معاملتة للست سواء مراته أو أمه أو أخته أو بنته أو واحده ما يعرفهاش في الشارع تبقي بأحترام يطلع من أحترامه لنفسه بغض النظر عن أي شكل أو تصرف خارجي يبرر أفعال واطية منه ؟ كده الرجالة زعلوا بس الستات أنبسطوا ...هييييه أخيرا حننكد عليهم ..ينفع الست تعرف أنها الحاجة الوحيدة اللي ممكن تخلي البيت سعيد و الأولاد مرتاحين ؟ كده الستات زعلوا هييييه و الأولاد أنبسطوا يلا ننكد عليهم ..ينفع الأولاد يفهموا أن تربيتنا ليهم مش من باب الرخامة لكن لمصلحتهم و أن دورهم في الحياة يذاكروا و يجتهدوا ويبعدوا عن جو الفساد المنتشر في المدارس؟ كده الأولاد زعلوا و المدرسين أنبسطوا يلا ننكد عليهم .زينفع المدرسين يفهموا أنهم بيؤدوا أخطر مهنة في الأمة و أن خطأ الطبيب تحت الأرض لكن خطأ المدرس يمشي علي الأرض و أن وظيفتهم مش مجرد مهنة بفلوس لكن رسالة و قدوة و وراثة للأنبياءيعلموا أولادنا أزاي يكون ليهم رأي و فكر بدل العتة الفكري اللي بنعاني منه من سنين ؟ كده المدرسين زعلوا و أصحاب الرأي و الفكر أنبسطوا يلا ننكد عليهم ..ليه كل واحد فاكر أنه لازم يبقي عنده رأي و فكر مع أنه من ثلاث سنين ما كانش يعرف أسم وزير الخارجية من وزير البترول ..دلوقتي يقعد و يعيش في دور أنه بيفهم و كما بيشرح علشان يفهم و أنه رأيه هو الحق والباقي يشتم ولو دورت جوه دماغه توم و جيري أو أهلي و زمالك أو أوكا و أورتيجا لازم نفهم أن المهمة الفترة دي تتلخص في كلمتين أولا تشوف شغلك بما يرضي الله و تعلم اللي أصغر منك ثانيا تربي أولادك كويس في كل الأتجاهات دينيا و خلقيا و علميا و بدنيا ..ما جبناش سيرة الأعلام و الصحافة ليه .. مش عايزين ننكد علي كل المصريين ..